Хорватия терма жамоасининг собиқ бош мураббийи Мирослав Чиро Блажевич 87 ёшида вафот этди. Бу ҳақда Хорватия футбол иттифоқи (HNS) расмий сайти хабар бермоқда. Мутахассис 88 ёшга тўлишига икки кун қолганида оламдан ўтди. У 2011 йилдан бери простата саратони билан курашиб келди.
1994–2000 йилларда Блажевич Хорватия терма жамоаси бош мураббийи бўлиб, у билан Евро-1996 чорак финалига қадар етиб борган ва 1998 йилги Жаҳон чемпионатида бронза медалини қўлга киритган.
Блажевич мураббийлик фаолияти давомида Эрон, Швейцария, Босния ва Герцеговина терма жамоаларини, Хитой ёшлар терма жамоасини ҳам бошқарган, Хорватия, Греция, Франция, Босния, Хитой, Словения, Эрон клубларида ишлаган. 1982 йилда Загребнинг "Динамо" жамоаси билан 1982 йилди Югославия чемпионатининг биринчи олтин медалини олган.
