Аксарият мамлакатларда қишки трансфер ойнаси аллақачон ёпилган. Бироқ январь ойидаги натижалар ҳаммани ҳам қониқтиравермайди - бу футболчиларга ҳам, клубларга ҳам тегишли. Кўпгина битимлар муваффақиятли расмийлаштирилди, аммо баъзи келишувлар оғзаки бўлиб қолди. Баъзи клублар ҳеч нарсасиз қолиб кетишди, ўйинчилар хоҳлаган бўлсаларда, ўз жамоасини алмаштира олмадилар. Қуйида январь ойидаги амалга ошмаган трансферлар ҳақида батафсил маълумот берамиз.
Милан Шкриньяр («ПСЖ»га ўтмаган)
«Интер» ҳимоячиси Милан Шкриньярнинг «ПСЖ»га ўтиши, унинг шартномаси муддати тугашини ҳисобга олсак, деярли амалга оширилгандек туюлганди. Парижликлар 27 ёшли марказий ҳимоячини ўз сафига қўшиб олмоқчи эканликларини очиқчасига эълон қилишди. Клублар музокара олиб бораётганини футболчининг ўзи ҳам тасдиқлади. Словакнинг бир оёғи аллақачон Парижда эди, бироқ охир-оқибат келишув барбод бўлди. «Нерадзуррилар» футболчини қўйиб юборишмади, чунки унга муносиб ўринбосар топилмади. Ҳикоя яхши якунланмади, Франция чемпиони жуда орзу қилинган ҳимоячисидан маҳрум бўлди ва Шкриньяр «Интер»да энди сардорлик боғичидан ҳам маҳрум бўлди.
Софьян Амрабат («Барселона»га ўтмаган)
«Фиорентина» ярим ҳимоячиси Софьян Амрабатнинг «Барселона»га ўтиши билан боғлиқ вазият қисқа бўлсада кинога ўхшарди. «Бинафшаранглар» спорт директори Даниеле Праденинг сўзларига кўра, ҳаммаси эрталаб соат 10 да бошланган ва ярим тунда тугаган. ОАВ хабарига кўра, футболчининг агентлари каталонияликларни «Фиорентина»га ўзлари учун мос келмайдиган таклиф билан чиқишга кўндиришган. «Бинафшаранглар» марокашликни машғулотларга келмаганидан кейин бошқа жамоага қўйиб юбормоқчи эди. Италияликлар ўз позициясида туриб, 26 ёшли ярим ҳимоячини таркибдан чиқариб юборишди. Энди мавсум охиригача Амрабат Флоренцияда қолади. Бунга биргина узр сўраш кифоя бўлди.
Хулиан Араухо («Барселона»га ўтмаган)
Трансфер ойнаси ёпилишига яқинроқ «Барселона» Эктор Белеринни «Спортинг»га қўйиб юборди. Унинг ўрнига каталонияликлар «Лос-Анжелес Гэлакси» ҳимоячиси Хулиан Араухони қўлга киритмоқчи эди. Томонлар ҳамма нарсани келишиб олдилар, аммо келишув амалга ошмади. «Кўк-анорранглилар» трансферга 18 сония кечикишди ва 21 ёшли ҳимоячисиз қолди, бироқ у аллақачон ушбу трансферга тайёр эди. Айтганча, шунга ўхшаш ҳолат 2017 йилда «Лестер» билан содир бўлганди. Ўшанда «тулкилар» Адриен Силвани рўйхатдан ўтказиш билан 14 сония кечикишган. Иккала ҳолатда ҳам ФИФА трансферларни рўйхатдан ўтказмаган. Қоидалар ҳамма учун бир хил бўлиши керак.
Николо Дзаньоло («Милан»га ўтмаган)
«Рома» ярим ҳимоячиси Николо Дзаньоло билан боғлиқ вазият Италияда қишки трансферлар вақтида энг кўп муҳокама қилинган воқеалардан бири бўлди. Футболчи Рим клубини тарк этиш истагини билдирган, бироқ кетолмаган. 23 ёшли ярим ҳимоячи учун асосий даъвогарлар «Милан» ва «Борнмут» эди. Футболчи миш-мишларга кўра, у билан шартнома шартларини келишиб олган «россонерилар»га тезроқ ўтишни истади. Аммо инглизлар римликларга яхшироқ таклиф юборишганди. Италиялик футболчи АПЛ аутсайдерига ўтишдан бош тортди. Шундай қилиб, ҳаммаси самарасиз уринишлар билан тугади. Дзаньоло якунда раҳбариятнинг танқиди ва мухлисларнинг ғазабидан бошқа ҳеч нарсага эриша олмади.
Хаким Зиеш («ПСЖ»га ўтмаган)
Парижликлар қишда жуда омадсиз кўринди. Аввалига улар «Интер»дан Шкриньяр трансфери учун рад жавоби олишганди. Кейин Франция чемпиони «Челси» вингери Ҳаким Зиешнинг трансфери бўйича келишувда муваффақиятсизликка учради. «ПСЖ» ҳаммасига «кўклар» айбдор эканлигини айтди. Миш-мишларга кўра, лондонликлар Энцо Фернандес учун «Бенфика» билан музокараларга шунчалик кўп эътибор қаратишганки, улар Зиешнинг кетиши учун парижликларга бир неча бор нотўғри расмийлаштирилган ҳужжатларни юборишган. Инглизлар барча хатоларни тузатганда, аллақачон кеч эди. «ПСЖ» яна ҳеч нарсасиз қолди. Марокашлик футболчи Грэм Поттердан ўйин вақти учун кафолатни олган бўлсада, «Челси»ни тарк этиш ниятида эди.
Мойзес Кайседо («Арсенал»га ўтмаган)
Январь ойида «Арсенал» «Брайтон» вингери Леандро Троссардни 24 миллион евро эвазига сотиб олди. Бу футболчининг бош мураббий Роберто Де Зерби билан жанжаллашиб қолгани туфайли рўй берди. Трансфер ойнаси ёпилиши арафасида «канонирлар» ярим ҳимоячи Мойзес Кайседони «Брайтон»дан олмоқчи бўлишди, аммо якунда у билан ҳеч нарса содир бўлмади. 21 ёшли ярим ҳимоячи учун «канонирлар» Троссарнинг нархидан кўпроқ суммани таклиф қилишди, аммо «Брайтон» раҳбарияти бунга у қадар ишонмади. Эквадорлик футболчи ижтимоий тармоқларда мухлислар билан хайрлашишга шаъма қилувчи постларни жойлаштирди, бироқ охир-оқибат у жамоасида қолди. Де Зерби Кайседо у учун муҳим футболчи эканлигини айтди.
Янник Карраско («Барселона»га ўтмаган)
«ПСЖ»да бўлганидек, «Барселона» ҳам қишки трансфер ойнасида ҳеч нарсани тартибга сола олмади (ёки қила олмади). Каталонияликларнинг мақсадларидан бири «Атлетико» вингери Янник Карраско эди. Аввалига «кўк-анорранглилар» футболчини Мемфис Депай учун келишувга қўшишни хоҳлашди, бироқ «матрасчилар» бунга рози бўлишмади. Улар тўғридан-тўғри ўйинчилар алмашинувига ҳам рози бўлишмади. «Барселона» 29 ёшли бельгиялик футболчини сотиб олишга тайёр эди, бироқ мадридликлар учинчи марта каталонияликлар таклифини рад этди. Карраско «Барса»га ўтишга рози бўлди, аммо трансфер амалга ошмади. Эҳтимол, ёзда бирор нарса қилиш мумкин.
