Мамлакатимиз спортчилари Паралимпия ўйинларида расман 2008 йили Пекинда бўлиб ўтган мусобақалардан иштирок этиб келадилар. Чин юртида бўлиб ўтган Паралимпия ўйинларида Ўзбекистон байроғини очилиш тантаналарида кўтариб ўтишдек масулиятли вазифа тажрибали спортчимиз Равил Диганшинга ишониб топширилган эди.
“Лондон-2012” Паралимпия ўйинларида эса бундай бахтга 2010 йили Гуанчжоуда бўлиб ўтган ПараОсиё ўйинларининг кумуш медал совриндори, кўплаб йирик халқаро мусобақалар ғолиби Ҳусниддин Норбеков сазовор бўлди.
“Албатта, бундай шарафли вазифани менга ишониб топширилгани қалбимда ғурур ва ифтихор туйғуларини янада жўш урдирди. Бундай шарафли вазифа ҳар бир спортчи учун улкан орзу ҳисобланади. Паралимпия ўйинларига йўлланмани қўлга киритганимда қувончимнинг чеки йўқ эди. Ўйинлар арафасида байроқдор бўлиш бахти менга насиб этганини айтишганида, қувончдан кўзларимга ёш келди. Эндиликда мен яна бир орзуйимни рўёбга чиқариш ишқида ёнмоқдаман. Яъни, Паралимпия ўйинларида шоҳсупанинг энг юқори поғонасига кўтарилиб, ватаним байроғини сарбаланд кўтариш. Бу йўлда бор куч ва маҳоратимни ишга соламан”-дейди Ҳусниддин Норбеков.
Ҳа, юртнинг асл ўғлонлари ҳамиша туғилиб ўсган ватанига содиқ фарзанд бўлишни мақсад қиладилар ва ана шу эъзгу ниятлар йўлида йиллар давомида орттирган билим ва махоратларини сафарбар қиладилар. Ниятимиз ўз олдига олийжаноб мақсадларни қўядиган ёшларимиз сафи кенгайиб, халқаро майдонлардаги муваффақиятларимиз сархад билмасин.
Шавкат Жалилов
Лондон шаҳрида махсус тайёрланди
