2022 йилги мавсумда Фарғона вилоят футбол ассоциацияси томонидан ўтказилган вилоят кубогида ғолиб чиққан «Цементчи» жамоаси Лига томонидан Биринчи лига мусобақасига қабул қилинди.

«Цементчи» Фарғона ФА лигасида 4-ўрин билан кифоялаганди. Жамоа кубок соҳиби сифатида ўтган йилнинг 10 ноябрь куни Қаршига бориб, ўз ҳудудларида кубокка эга чиққан жамоалар ўртасидаги мусобақада 2-ўринни қўлга киритди ҳамда Биринчи лигага ўтиш турнирида иштирок этадиган бўлди. Шу йилнинг 4 декабрь куни эса Бухоро мезбонлик қилган ўтиш турнирида Цементчи яна 2-ўринга эга чиқди ҳамда Биринчи лигада иштирок этиш учун уч даъвогардан бирига айланди.

Шу асосда Лига «Цементчи» футбол клубини 16 январь куни қабул қилди ҳамда уч асосий талабни бажариш учун муддат белгилади. Қувасойликлар жамоа Устави, гувоҳномаси, молиялаштириш манбааси, Устав асосида сайланган директор, шунингдек, жамоа стадиони, ўқув-машғулот қароргоҳи бўйича ҳужжатларни Лигага тақдим этди ҳамда Биринчи лига иштирокчиси сифатида аъзоликка қабул қилинди.

Маълумот учун, «Цементчи» жамоаси «Буилдинг Материалс Продуcтион анд традинг гроуп» МЧЖ томонидан молиялаштирилади. Айни вақтда Абдусамад Назирдинов клуб директори сифатида фаолият олиб бормоқда.

Ўзбекистон Профессионал футбол лигаси «Цементчи» футбол жамоасининг кейинги фаолиятига омад тилаб, қувасойлик футбол мухлисларини муборакбод этади.