Инсон хаётида шундай воқеалар бўладики, ҳеч қачон унутилмайди. Ёрқин хотира сифатида умрбод ёдда сақланади.
Бугун Лондон шаҳридаги Паралимпия шаҳарчасида Ўзбекистон байроғини кўтарилишига бағишланиб ўтказилган тадбир ҳам, унинг қатнашчилари хаётида унутилмас лахзаларни мухрлади. Бу каби тадбирлар она Ватанга бўлган садоқатни, мехр-муҳаббатни, фидоийликни янада юксалтириб, қалбларни фахр ва ифтихор туйғуларига тўлдиради.
Давлатимиз байроғининг кўтарилишига бағишланиб ўтказилган тадбирда делегациямиз аъзолари билар бирга, ташкилий қўмита вакиллари, Ўзбекистоннинг Буюк Британиядаги элчихонаси ходимлари иштирок этдилар.
Тадбирда сўзга чиққанлар, Ўзбекистонда Паралимпия харакатини ривожлантириш борасида кўплаб ибратли ишлар амалга оширилаётганлигини, айниқса, мана шундай хайрли ишларга мамлакатимиз раҳбарияти томонидан алоҳида эътибор қаратилаётганлигини мамнуният билан таъкидлаб, XIV Паралимпия ўйинларида Ватанимиз шарафини ҳимоя қиладиган барча спортчиларимизга омад ва зафарлар ёр бўлишлиги тилашди.
Шундан сўнг мадҳиямиз садолари остида музаффар байроғимиз сарбаланд кўтарилди. Давлатимиз байроғи кўтарилар экан, энди ана шу жараён спорт саройларига ҳам кўчсин дея ният билдирдик.
Ҳақиқий байрамона рухда ўтган тадбирда турли театрлаштирилган чиқишлар ҳам намойиш этилди.
Шавкат Жалилов
Лондон шаҳридан махсус тайёрланди
