Хабарингиз бор, «Навбаҳор» айни пайтда Туркияда ўқув-машғулот йиғинини ўтказмоқда. Мазкур йиғин доирасидаги навбатдаги назорат-синов баҳсини “Навбаҳор” бугун Россиянинг “Уфа” жамоасига қарши ўтказди.

Мазкур учрашувнинг 1-бўлимида дарвозаларга тўп киритилмади ва жамоалар танаффусга 0:0 ҳисобидаги дуранг натижа билан йўл олди.

Баҳснинг 2-бўлимида ҳар икки клубнинг захирадан майдонга тушган футболчилари гол уришди. Учрашувнинг 68-дақиқасида наманганликларнинг маҳоратли ҳужумчиси Жасур Яхшибоев ҳисобни очган бўлса, 75-дақиқада уфаликларнинг колумбиялик форварди Дилан Ортис “Навбаҳор” дарвозасига белгиланган пенальтини аниқ амалга ошириб, ҳисобни тенглаштирди ҳамда ушбу ўйиннинг 1:1 ҳисобидаги дуранг натижа билан якунланишини таъминлади.

Ўз навбатида учрашувнинг 48-дақиқасида жамоамизнинг тажрибали ҳимоячиси Давронбек Ҳошимов қизил карточка олиб, майдондан четлатилганлигини ҳам таъкидлаш жоиз.

“Лочинлар” Туркия йиғини доирасидаги навбатдаги ўртоқлик баҳсини 16 февраль куни Россиянинг “Балтика” клубига қарши ўтказишни режалаштиришган.

Назорат ўйини
“Навбаҳор” – “Уфа” – 1:1 (0:0)
Голлар: Жасур Яхшибоев (68) – Дилан Ортис (75-пен.).
“Навбаҳор”: Ўткир Юсупов, Давронбек Ҳошимов, Игорь Голбан, Милош Милович, Лука Чермель, Остон Ўрунов, Жамшид Искандеров, Аброр Исмоилов, Йован Жокич, Асадбек Собиржонов, Темурхўжа Абдухолиқов.
Захирадан майдонга тушганлар: Жасур Яхшибоев, Жамшид Болтабоев, Иброҳим Йўлдошев, Шаҳбоз Жўрабеков, Фаррух Икромов.
“Уфа”: Иван Кукушкин, Лев Ушахин, Эрвинг Ботака, Александр Сухов, Эгаш Касинтура, Андрей Никитин, Данила Емельянов, Артём Погосов, Артём Голубев, Алексей Евсеев, Роман Минаев.
Захирадан майдонга тушганлар: Дилан Ортис, Кэтэлин Карп ва “Уфа” кўригида бўлган 4 нафар янги футболчилар.

“Навбаҳор” ПФК матбуот хизмати.