Поттернинг "Челси"даги аҳволидан ҳозир ҳамманинг хабари бор. У учун бу давр осон кечмаяпти. Жамоанинг салбий натижаларига қарамай, клуб эгаси Тод Бёли ўзига 22 миллион фунтга тушган мураббийни ишдан олишга шошаётгани йўқ. Айни дамда бу жамоа сўнгги бешта ўйинда бирорта ҳам ғалаба қозона олгани йўқ. Шу баҳсларда фақат биттагина гол урган холос. АПЛда "Челси"нинг 14 та ўйини фақат икки ғалаба билан якун топган. Ушбу рақамлар охир-оқибат клубни кучли тўртликдам кўра, хавфли ҳудудга яқин қилиб қўйди. Аммо, айни дамда "Челси" учун натижалардан ҳам кўра, ўзига бўлган ишонч муҳимроқ бўлиб турибди. Хўш, Поттер ўрнида бошқа мутахассислар яхшироқ жамоа туза оладими? Бизнингча, бундай таркиб билан анча кучли бўлиш мумкин. Қуйида мураббийликка номзодлар номи ҳақида сўз боради.
Маурисио Почеттино
Омад ва иқтидор билан йўғрилган неки футболчи бўлса, ҳаммаси "Челси"га келди. Тодд Бёли қиммат нархларга ёш футболчиларни сотиб олди. Ушбу ўйинчилар юқори техникага эга ва уларни кўпроқ прессингда ўйнатиш мақсадга мувофиқ бўларди. Яна нима дейиш мумкин, бу таркиб Поттердан кўра Почеттинонинг орзусидаги жамоага яқинроқдир. Таққослаш учун келтирамиз, Поттер табиати Гвардиоланикига жуда ҳам ўхшаш. Почеттино эса Марсело Бьелсанинг сал мўътадилроқ вариантидир.
Аргентиналик мутахассис майдонда ўз шогирдларини иложи борича камроқ паслар орқали вертикал футбол ўйнатади. Нисбатан қарши ҳужумларга асосланган, қанот футболчиларидан кўп фойдаланувчи ва мослашувчан футбол, Почеттинони ифода этади. Унинг услуби, шунингдек, кучли прессинг ва имкон бўлди дегунча тўпни диагоналлар орқали очиқ ҳудудларга оширишни кўзда тутади. Рис Жеймс, Марк Кукурелья Энцо Фернандес, Канте, Стерлинг ва Мудрик, юқоридаги гапларни майдонда айнан амалга ошириб бериш учун ўта мос футболчилар. Почеттино ҳам ўз навбатида "Челси"да яхши лойиҳага асос сола олади. У жамоага келса, ҳатто Лукакуни ҳам қайтариб олиб келиб, ундан мақсадли фойдалана олади. Гарчанд унинг "ПСЖ"даги юлдузли футболчиларга йўғрилган таркиб билан ишлари юришмаган бўлса ҳам, у инглиз футболида бемалол исталган жамоани қайта қуришга қодир бўлади.
Зайниддин Зидан
Айтиш мумкинки, Зайниддин Зидан Почеттинонинг тактик жиҳатдан мутлақо тескари версиясидир. Ҳа, у "Реал" мактабини кўрган, у ерда гуллаб-яшнаган эди. Зиданда Анчелотти каби ҳар қандай ўйинга футболчиларни тўғри танлаш ва улардан тўғри фойдаланиш қобилияти мавжуд. Бироқ, унда бугунги замонавий АПЛ талаб қилаётган, баҳсларни моҳирона бошқариш борасида муаммолар бор. У кўпроқ "ПСЖ" мосроқ. Чунки Зидан супер-юлдузлар билан қандай ишлашни яхши билади. Аммо янги қараш, янги бренд ва инновация яратиш учун Зидан варианти тўғри келмайди. Зиданга кўпроқ, жамоада ёши катта ва тажрибали футболчилар бўлгани яхши. Тиагу Силва, Канте ва Ковачичлар у билан яхши чиқишган бўларди. Хуллас, таркиб пишиб етилган бўлсагина, Зидан "Челси"да нималаргадир қодир бўлади.
Луис Энрике
"Барселона" ва Испания термасида Энрике дуч келган муаммолар бисёр эди. У бу икки жамоани тўп назоратига асосланган ўйин билан қабу қилиб олиб, футболчилар қобилиятига кўра, уларни вазифалантириб чиққанди. Энрике ҳам тўпни рақибдан кучли прессинг орқали олиб қўйишни маъқул кўради. Аммо Почеттино ва Энрике услубларида фарқ бор. Испаниялик мутахассис ҳужумчиларига кўпроқ импровизация қилишларига имкон беради. Хусусан, у "Барса"да Неймар, Месси ва Суаресни ҳужумда бир-бирига ўта яқин ўйнатарди. У шу орқали футболчиларни бир бири билан майдондаги алоқаларини яхши таъминлаган. Бу жиҳатдан олиб қараганимизда, услубан Энрикени Почеттино ва Поттернинг ўртасига қўйсак бўлади.
ИСМАТОВ Ж.
