Испания пойтахти Мадридда маҳаллий "Реал Мадрид" ва "Атлетико" ўртасидаги ўйин олдидан "Қироллик клуби" ярим ҳимоячиси Лука Модрич ва "матрасчилар" ҳимоячиси Стефан Савич тасвирланган баннер пайдо бўлди. Ушбу акциянинг ташаббускори DAZN нашридир.
Эътиборлиси, баннер яқинда “Атлетико” мухлисларининг баъзи вакиллари “Реал”нинг бразилиялик ҳужумчиси Винисиус Жуниорга нисбатан ҳақоратлар ёзилган жойда пайдо бўлган.
Янги баннерда Модрич ва Савич қучоқлашаётгани тасвирланган ва тагида: “Мадрид Мадридни севади” изоҳи келтирилган. DAZN ҳам ушбу ҳаракат ҳақида ижтимоий тармоқдаги постига: “Футболда ва спортда нафратга ўрин йўқ” дея изоҳ қолдирган.
"Реал Мадрид" - "Атлетико" учрашуви бугун, 25 феврал куни бўлиб ўтади. Учрашув Тошкент вақти билан 22:30да бошланиши режалаштирилган.
