Гранит Жака етти мавсумдан бери "Арсенал"да фаолият юритиб келмоқда. У икки мавсум олдин мухлислар билан уришиб қолиб, жамоадан кетмоқчи эди. Аммо ундай бўлмади. Швейцариялик ярим ҳимоячи 2016 йилнинг ёзида 35 миллион фунт эвазига харид қилинади. Ҳозирда 30 ёш бўлган футболчи Микель Артета жамоасида муҳим ўрин тутди. 2016 йилда Арсен Венгер жамоани кучайтириш учун 100 миллион фунтга футболчилар харид қилганди. Қуйида Жака билан жамоага олиб келинганлар ва уларнинг тақдири ҳақида сўз боради.
Шкодран Мустафи
Мустафи "Валенсия"дан 35 миллион эвазига харид қилинади. Германия сафида Жаҳон чемпионига айланган ҳимоячи, аввалига ҳаммасини ажойиб бошлаганди. У билан "Арсенал" 21 та баҳсда мағлубиятга учрамайди. Мустафи фаолиятига биргина жиддий жароҳат катта доғ бўлиб тушди. Шундан кейин у ўзини тиклай олмади ва кейинги мавсумларда захирада қолиб кетди. Германиялик футболчи 2021 йилда клуб билан хайрлашганди. Мустафи "Арсенал"да 150 та ўйин ўтказган. Унинг кейинги манзили "Шальке 04" бўлди. Айни дамда Шкодран Ла-лиганинг "Леванте" клубида ҳаракат қилади.
Такума Асано
Асано 2016 йилда 20 ёшли ўспирин сифатида жамоага келади. Кўплар бу трансферни танқид қилганди. Негаки, у Япониянинг иккинчи дивизионидан харид қилинган. "Арсенал"нинг асосий таркибида япониялик ҳужумчи учун жой йўқ эди. Шу сабаб у 2019 йилда Белград шаҳрининг "Партизан" клубига сотиб юборилади. Асано Венгер даврининг энг ўшхамаган трансфери бўлиб қолади.
Роб Холдинг
"Болтон"дан 2016 йилнинг ёзида 20 ёшли марказий ҳимоячи сотиб олинади. Унинг сими Холдинг эди. Унинг хариди тўпчилар учун 2 миллион фунтга тушган ва кўпчилик норозилигига сабаб бўлганди. Холдинг ҳали ҳам клуб сафида Салиба ва Габриэл ўринбосари сифатида ҳаракат қилади. Микель Артета уни асосан захирадан ҳисобни ушлаб қолиш керак бўлган пайтларда туширади. Холдинг бугунга келиб ёш жамоанинг катта футболчисига айланган. У мухлислар ва жамоадошлари томонидан қадрланади.
Лукас Перес
"Арсенал"нинг Жейми Вардини сотиб олиш операцияси амалга ошмайди. Шу сабаб Арсен Венгер 2016 йилда "Депортиво"дан Лукас Пересни олиб келади. У 17 миллион фунтга сотиб олинганди. Гарчанд у ЕЧЛда "Базель" дарвозасига хет-трик йўллаган бўлса ҳам, Венгер унга ишонч билдирмади. Кейинги мавсумда у "Вест Хэм"га 5 миллион эвазига сотиб юборилганди. Перес "Арсенал"да жами 21 та ўйин ўтказиб, 7 та гол ва 5 та ассист қилишга эришган.
Келечи Нвакали
Нигериянинг 17 ёшгача бўлган терма жамоаси 2015 йилги Жаҳон чемпионатида зафар қучади. Ўшан таркибда Виктор Осимхен бор эди. У турнирнинг "Олтин бутса"сига эга чиққан. Унинг жамоадоши Келечи Нвакали эса энг яхши футболчи сифатида "Олтин тўп" совринига лойиқ топилади. Бу иккисининг тақдири кейинчалик икки хил кечди. Нвакали "Арсенал" томонидан 2016 йилда сотиб олинади. Арсен Венгер у ҳақида шундай деганди: "Биз Нвакалини топ-футболчи қиламиз. Унинг жаҳон чемпионатида кўрсатган ўйини ҳаммасига исбот бўла олади".
"Арсенал" ёш футболчисини ижараларга берди. Аммо асосий жамоага чақирмади. Орадан уч йил ўтиб, у "Уэска" клубига кўчиб ўтди. Айни дамда у 23 ёшда ва ҳали ўзидан кутилган натижаларни бергани йўқ. Аммо унинг собиқ жамоадоши Осимхен "Наполи"да катта ишларни амалга ошириб ташлади.
ИСМАТОВ Ж.
