Каталониянинг «Барселона» футбол клуби аргентиналик ҳужумчи Лионель Мессига умрбод шартнома таклиф қилмоқчи, деб хабар бермоқда AS нашри.

Август ойининг ўрталарида Каталония клуби директорлар кенгашининг мажлиси бўлиб ўтган ва унда футболчининг карьераси якунлангунга қадар Месси билан шартнома имзолаш ҳақида қарор қабул қилинган. AS нашри маълумотларига кўра, «Барселона» президенти Сандро Россель 25 ёшли футболчи билан янги шартнома борасида музокараларни бошлаган.

Агар Месси рози бўладиган бўлса, бу унинг «Барселона» билан шартномасини олтинчи марта узайтириши бўлади. 2005 йилнинг июнида аргентиналик футболчи илк марта Каталония клуби билан профессионал шартнома имзолаган ва орадан уч ой ўтибоқ битимни яхшиланган шартлар билан қайта имзолаган эди.

2007 йилнинг яныарида Месси «Барселона» билан етти йиллик шартномага қўл қўйган, ва унга кўра товон пули 150 миллион евро этиб белгиланган эди. 2008 йилнинг июнида янада яхшиланган шартлардаги шартномани имзолаган эди. 2009/10 йилги мавсум бошланиши аввалида Месси «Барселона» билан 2016 йилгача янги шартнома имзолади. Амалдаги ушбу шартномага кўра товон пули 250 миллион еврони ташкил этади.

Ҳозирча «Барселона»нинг таклифига Мессининг реакцияси маълум эмас. Бироқ, футболчи аввалроқ ўз карьерасини бир пайтлар ўзи ўйнаган ва 2000 йилда Испанияга келгунга қадар тўп сурган Аргентинанинг «Ньюэллс Олд Бойз» клубида ниҳоялаш нияти борлигини айтиб ўтганди.

«Барселона» билан Месси беш марта Испания чемпиони, икки мартадан Кубок ва Суперкубок соҳиби бўлган. Каталонияликлар таркибида у уч марта Европа чемпионлар Лигаси ғолиби, икки марта Клублар ўртасида Жаҳон чемпиони унвонларига сазовор бўлган.