“Челси” ҳимоячиси Тьяго Силва АПЛнинг 25-туридан ўрин олган “Тоттенхэм”га қарши ўйинда (0:2) жароҳат олди, деб хабар беради лондонликлар матбуот хизмати.

Кеча, 27 февраль куни бразилиялик футболчи клуб машғулотлар маркази ҳудудида кўрикдан ўтказилди. Текширув натижалари тизза лигаментларининг шикастланишини тасдиқлади.

Силванинг тикланиши камида 6 ҳафта давом этади. У 7 март куни бўлиб ўтадиган Чемпионлар лигаси 1/8 финали доирасидаги "Боруссия"га қарши жавоб ўйинини ўтказиб юборади.

38 ёшли футболчи жорий мавсумда АПЛда 21 та ўйинда майдонга тушиб, 2 та голга ассистентлик қилди.