Туркиянинг Истанбул шаҳрида давом этаётган 40-Бутунжаҳон шахмат олимпиадасида кеча қизиқарли кунлардан бири бўлди. Ўзбекистон қизлар терма жамоаси кучли рақиблардан бири - Венгрияни мағлубиятга учратишга муваффақ бўлди ва мусобақа жадвалида 5-ўринга кўтарилиб олди!

Терма жамоа аъзолари - Нафиса Мўминова, Нодира Нодиржонова ва Сарвиноз Қурбонбоева ўз партияларида дуранг қайд этишган бўлса, Ирина Геворгян рақибини мот қилиб, термамизнинг ғалабасига ҳисса қўшди.
8-тур. Ўзбекистон - Венгрия - 2,5-1,5
Нафиса Мўминова - Тан Транг Хоанг - 0,5-0,5
Ирина Геворгян - Анна Рудольф - 1-0
Нодира Нодиржонова - Анита Гара - 0,5-0,5
Сарвиноз Қурбонбоева - Петра Папп - 0,5-0,5

Айтиб ўтганимиздек, Ўзбекистон қизлар терма жамоаси 8-турдан кейин 5-ўринни эгаллаб туришибди. Улар ўзларидан олдинда турган Россия, Франция ва Ҳиндистон билан бир хил - 13 очко жамғаришган (6та ғалаба, 1та дуранг ва 1 мағлубият). Фақатгина қўшимча кўрсаткичлар эвазига Ўзбекистон улардан ортда қолмоқда. 1-ўринни эгаллаб турган Хитой терма жамоаси эса 14 очкога эга.

Бугун бўлиб ўтадиган 9-тур учрашувларида қизларимизга Қозоғистон терма жамоаси рақиблик қилади. Қўшниларимиз ҳам мусобақада яхши иштирок этишмоқда. Улар 12 очко билан ҳозирча 9-ўринни эгаллаб туришибди. Улар мусобақа 22-рейтингли жамоа сифатида тартибланишган. Ўзбекистон ва Қозоғистон ўртасидаги партиялар шиддатли ва қизиқарли ўтиши аниқ. Ушбу ўйиндаги ғалаба қизларимизга медаллар учун курашиш имкони сақлаб қолиш имконини беради.

Эслатиб ўтамиз, Бутунжаҳон шахмт олимпиадасининг қизлар мусобақасида 127та мамлакат вакиллари иштирок этишмоқда.