40-бор ўтказилаётган Бутунжаҳон шахмат олимпиадасининг 9-турида Ўзбекистон эркаклар терма жамоаси Словенияга қарши ўйинда иштирок этди.

Терма жамоамизда бу сафар Андрей Квон ўрнини Жўрабек Ҳамроқулов эгаллади. Партияларга тўхталадиган бўлсак, Рустам Қосимжонов рақиби билан дуранг ўйнади. Антон Филиппов эса қора доналарда ўйнашига қарамай, аввал рақибнинг ҳамлаларини бартараф этди ва сўнгра ўзи ғалаба қозонишга муваффақ бўлди.

Марат Жумаев ҳам ғалаба умидида ўйинни энг охиригача олиб боришга ҳаракат қилди. Аммо рақиб ҳам анойилардан эмаслигини кўрсатди ва ўйиндан дуранг натижа қайд этилди.

Бу пайтда Ҳамроқуловнинг ўйини давом этаётган ва терма жамоамиз 2-1 ҳисобида олдинга чиқиб олганди. Жўрабек эса рақибига нисбатан пиёдалари сонига биттага камроқ эди. Словениялик шахматчи мана шу устунликдан фойдаланишга муваффақ бўлди ва умумий ҳисобни тенглаштира олди - 2:2.

Ўзбекистон - Словения - 2-2
Рустам Қосимжонов - Александр Бельявский - 0,5-0,5
Антон Филиппов - Матье Себеник - 1-0
Марат Жумаев - Юре Борисек - 0,5-0,5
Жўрабек Ҳамроқулов - Юре Скоберне - 0-1

Бу терма жамоамизнинг олимпиададаги иккинчи дуранги сифатида қайд этилди.  Йигитлар 21-ўринга тушишга мажбур бўлишди (18-ўриндан). 15 очкога эга бўлган Хитой, Россия, Арманистон ва АҚШ терма жамоалари жадвални бошқаришмоқда.

Ўзбекистон терма жамоаси 10-турда Болгарияга қарши дона суради. Бу жамоа ҳам худди терма жамоамиз каби 12 очко тўплаган ва 20-ўринни эгаллаб турибди. Болгария мусобақада 10-тартиб рақамга эга. Болгарларнинг 1-рақамли шахматчиси - машҳур Веселин Топалов.