"Ливерпуль" ҳужумчиси Муҳаммад Салоҳ Англия чемпионати доирасида "Манчестер Юнайтед" устидан қозонилган йирик ғалабадан сўнг интервью берди. Ушбу учрашувда мисрлик футболчи "қизиллар" сафида Премьер-лигада гол уриш бўйича рекорд ўрнатди.
"Сўз билан ифодалаб бўлмайдиган ўзига хос туйғулар. "Энфилд"га келганимдан бери бу рекордни ёдда тутганман. Биринчи мавсумдан бошлаб унга эришишга ҳаракат қила бошладим. Уни "Манчестер Юнайтед"га қарши ўйинда қўлга киритиш жуда ажойиб бўлди. Мен буни оилам билан бир пиёла чой устида нишонламоқчиман", - деди Салоҳ Sky Sports билан суҳбатда.
30 ёшли ҳужумчи жорий мавсум Англия Премьер-лигасида 25 та ўйинда майдонга тушиб, 11 та гол урди ва 7 та голли узатмани амалга оширди.
