“Рома” ҳужумчиси Пауло Дибала А Серия 25-турида собиқ жамоаси устидан қозонилган ғалабани (1:0) нишонлаган аргентиналикни танқид қилган “Ювентус” мухлисларига мурожаат қилди.

“Сизга қийин эканини биламан, лекин бугун мен бошқа жамоада ва бошқа жамоадошлар билан ўйнаяпман, уларни ҳурмат қилишим керак! Ғалаба қозониш ҳеч қачон осон эмас, бу биз учун муҳим эди.

Голдан хурсанд бўлмадим, ғалабани шерикларим билан нишонладим. Буни кўрмаганингиздан афсусдаман, барчангизни қучоқлаб, севаман”, - дея Дибаланинг сўзларини келтирган журналист Альфредо Педулла.

29 ёшли ҳужумчи ўтган ёзда "Рома"га ўтган эди. Аввалроқ у "Ювентус"да 7 мавсум ўйнаган. Дибала жорий мавсум А Серияда 18 та ўйинда майдонга тушиб, 8 та гол урди ва 7 та голли узатмани амалга оширди.