11 сентябрь куни терма жамоамизга рақиблик қиладиган Жанубий Корея терма жамоаси Тошкентда машғулотлар ўтказаётганидан хабарингиз бор. Бугун бўлиб ўтган Ўзбекистон ва Кувайт ўртасидаги ўртоқлик ўйинини терма жамоа бош мураббийи Чой Канг Хи стадиондан кузатди. Кореянинг Yonhap News ахборот агентлиги бош мураббийдан рақиб жамоанинг йирик ҳисобда ғалабаси билан тугаган ўйини ҳақидаги фикрлари билан қизиқди.

“Ўзбекистоннинг рақиби жуда кучсиз кўринди. Ўзбекистоннинг асл кучини бахолаш учун етарли бўлмаган ўйин. Ўтган саралаш босқичидаги ўйинлар билан қўшиб, кенгроқ фикрлаш керак”, дея сўз бошлади Канг Хи. “Биз билан бўладиган ўйин бошқача бўлиши тайин. Тактик жиҳатдан катта ўзгаришни сезмадим. Рақиб ҳолатини билиш мухим, аммо мен учун энг зарур нарса ўз шогирдларимнинг ҳолати. Ҳозирча ҳаммаси яхши”, дея фикр билдирган мураббий. “Рақиб ўз уйида ўйнашини ҳам хисобга олишимиз лозим. Ҳар қандай хато қимматга тушиши мумкин. Шогирдларим ўзларига бўлган ишончни йўқотмасликлари керак”, дея қўшиб қўйди кореялик мураббий.

Отабек Йўлдошев