“Андижон” 2-тур учрашувини ҳам яна меҳмонда ўтказади. Бу сафар Тошкентдаги “Пахтакор” стадионида “Сурхон” клубига қарши майдонга тушади.
Хабарингиз бўлса, “Сурхон” уй ўйинларини вақтинча мезбон сифатида “Пахтакор” стадионидан фойдаланиб турибди.
Чемпионатнинг дастлабки турида “Сурхон” ОКМКга қарши учрашувда 3:1 ҳисобида мағлубиятга учраган бўлса, “Андижон” Қаршида “Насаф”ни 0:1 ҳисобида енгиб қайтди. Ҳозирда асосий эътибор “Сурхон”га қарши баҳсга қаратилган.
Ушбу жамоалар охирги бор 2021 йили ўзаро тўқнаш келишган. Андижондаги учрашувда "Андижон" 1:0 ҳисобида ғолиб чиққан. Иккинчи даврадаги тўқнашувда “Сурхон” 2:0 ҳисобида устун келган.
Мазкур клубларнинг чемпионатимиз тарихидаги ўзаро ўйинлар статистикасига келадиган бўлсак, бунга қадар “Сурхон” ва “Андижон” 30 маротаба майдонда тўқнашишган. Қарама-қаршиликлардаги устунлик “Бургутлар” тарафида.
Бу рақамларда ҳам акс этган.
Айтайлик, “Сурхон”нинг ҳисобида 9 та, “Андижон”да эса 16 та ғалаба бор. 5 та ўйинда кучлар тенг келиб қолган. Тўплар нисбати 37\57 “Андижон” фойдасига.
Энг йирик ғалабалар ҳам “Андижон”нинг фойдасига ҳал бўлган. Жумладан, 5:1, 6:2, 3:0, 4:0, 0:5 натижалари билан “Сурхон” тор-мор этилган ўйинлар кузатилган. Шунинг учун ҳам “Андижон” клуби “Сурхон”га қарши беллашувларда яхшигина устунликка эга.
Эслатиб ўтамиз, "Сурхон" - "Андижон" беллашуви 11 март куни соат 17:00 да "Пахтакор" стадионида бошланади. Учрашув "Дунё бўйлаб" телеканали орқали тўғридан-тўғри эфирга узатилади.
