Франциянинг “ПСЖ” клубини италиялик ярим ҳимоячиси Марко Верратти фаолиятини якунламасдан олдин ватанига қайтиши мумкинлиги ҳақида гапирди. Футболчи ҳар доим ғалаба қозонишни исташини айтди, бироқ келажакда Италия чемпионатига ўтишни истисно этмади.
"Фаолиятим тугашидан олдин Италияга қайтишим мумкинми? Мен ҳар доим ғалаба қозонишни хоҳлардим, лекин бу ҳар доим ҳам мумкин эмас. Мен ўсишни хоҳлайман, узоқ вақт ўйнаб, ғалаба қозонишни хоҳлайман. Италияга қайтаманми? Келажакда кўрамиз", - деди Верратти Football Italia билан суҳбатда.
30 ёшли Верратти Италиянинг "Пескара" клуби тарбияланувчиси бўлиб, у ердан 2012 йилда "ПСЖ"га ўтган эди. Ярим ҳимоячи ҳеч қачон Италиянинг бошқа жамоаларида ўйнамаган. Унинг парижликлар билан шартномаси 2026 йилнинг ёзига қадар амал қилади.