Ансу Фатининг "Барселона"даги келажаги сўроқ остида қолмоқда.
Diario Sport хабарига кўра, 20 ёшли қанот ҳужумчисининг отаси Бора Фати "Барса" директорлари Хорди Кройфф ва Матеу Алемани билан учрашган. Айни дамда Ансунинг Каталония клубидаги келажаги аниқланмаган ва "блауграна"нинг оғир молиявий аҳволи Премьер-лига клублари қизиқиш билдираётган футболчининг кетишига ҳисса қўшиши мумкин.
Журналист Елена Кондиснинг қайд этишича, учрашувда Ансу Фатининг кетиши мумкинлиги ҳақида ҳеч қандай гап бўлмаган. Футболчининг отаси Ансунинг жамоадаги ролидан хавотир билдирди. Алемани эса футболчига ишонишларини ва таркиб борасида барча қарорларни Хави қабул қилишини айтди.
Жорий мавсумда Фати “Барселона” сафида барча турнирлар доирасида 38 та ўйинда майдонга тушиб, 6 та гол урди ва 3 та голли узатмани амалга оширди.