Маълумки, сешанба куни Осиё чемпионлар Лигасининг чорак финали дастлабки учрашуви доирасида Тошкентнинг "Бунёдкор" клуби Австралиянинг Аделаида шаҳрида маҳаллий "Аделаида Юнайтед" клубига қарши майдонга тушади.
"Қалдирғочлар" фан клубининг бир неча аъзоси ушбу ўйинда чемпионимизни қизғин қўллаб-қувватлаш учун Куала-Лумпур орқали Австралияга учишган эди. Улар айни дамда Аделаида шаҳрида бўлиб туришибди.
Улар шаҳардаги беш юлдузли "Crown Plaza Adelaide" меҳмонхонасига бориб жойлашишган. Қизиғи шундаки, эртага Аделаида шаҳрида етиб борадиган "Бунёдкор" футбол клуби ҳам айнан шу меҳмонхонадан ўрин олишади. Айни дамда парвозда бўлиб турган клуб футболчиларининг фан-клуб уларни Австралияда кутиб олишларидан хабари йўқ ва мухлислар жамоа аъзоларига ўзига хос сюрприз уюштиришни ният қилишган.
"Бунёдкор" фан-клубига ушбу сафарни уюштиришда ёрдам берган Абдураҳмон Фозиловнинг айтишича, Аделаидада иқлим баҳор фаслига монанд тарзда анча салқин, лекин бу футбол ўйнаш учун тўсқинлик қилолмайди.
Айни дамда шаҳарда дам олиш кунлари ҳукм сураётгани учун кўчаларда ҳеч ким йўқ. Барча-барча Аделаиданинг чеккароғида уюштирилаётган хайрия марафонида югуришда қатнашмоқда.
