Астанада бўлиб ўтаётган Қозоғистон ва Ўзбекистон терма жамоалари ўртасидаги Девис кубоги учинчи кун мусобақаси илк баҳси мамлакатларнинг биринчи рақамли теннисчилари — Михаил Кукушкин ва Денис Истомин ўртасида бўлиб ўтди.

Қуръага кўра, тўпни биринчи бўлиб ҳамюртимиз киритадиган бўлди. Аммо Денис дастлабки геймни рақибига бериб қўйди. Ҳисоб 5-4га етгунига қадар спортчилар ўз геймларини қўлга киритиб боришди. 10-геймда тўпни ўйинга Кукушкин киритди. Афсуски, Денис биринчи сетни қутқариб қола олмади. Сет бошида йўл қўйилган хато ҳамюртимизга қимматга тушди.

Иккинчи сетда эса Истомин рақибига бирданига 2та брейк қилиш имконини берди. Натижада Кукушкин сетни осонгина ютиб олди — 6-2.

Учинчи сетни ҳам Михаил Кукушкин брейк билан бошлади. Истомин негадир уни ҳам рақибига топшириб қўйди. Сет давомида ҳамюртимиз ўйиндаги илк брейк-поинтига эга бўлди ва уни илк уринишда ютиб олиб, ҳисобни тенглаштирди. Бироқ ҳисоб 5-5га етганидан кейин Денис яна ўз геймини ютқазиб қўйди. Кейинги геймдаёқ (қозоғистонлик спортчининг гейми) Ўзбекистоннинг 1-ракеткаси 2та брейк-поинтга эга бўлди – 15-40. Михаил битта брейк-поинтни бартараф этган бўлса-да, Денис барибир сетдаги ҳисобни тенглаштирди – 6-6. Ўта муросасиз кечган тай-брекда эса Истомин Қозоғистоннинг 1-рақамли теннисчисини 7-5 ҳисобида мағлуб эта олди. Ушбу сет жуда катта машаққат эвазига қўлга киритилди.

Тўртинчи сетнинг 6-геймида ҳамюртимиз яна бир марта геймни рақибга топшириб қўйди. Кукушкин эса кейинги — ўз геймини ютди ва ҳисобни 5-2га етказди. Денис Истомин тўпни ўйинга киритган кейинги геймда қозоғистонлик ракетка устаси бирданига 3та матч-болга эга бўлди — 0-40. Дунё рейтингида 34-ўринда бораётган теннисчимиз унинг 2тасини бартараф этди, аммо учинчисига келганда Кукушкин ғалаба очкосини қўлга киритди.

Якуний ҳисоб: Михаил Кукушкин (Қозоғистон) – Денис Истомин (Ўзбекистон) – 3-1 (6-4, 6-2, 6-7(5), 6-2). Негадир Денис Истомин ўз имкониятлари даражасида ўйнай олмади. Уч кунлик баҳслар уни чарчатиб қўйди, шекилли

Ушбу баҳсдан кейин Қозоғистон ва Ўзбекистон ўртасидаги ҳисоб 3-1га етди ва сўнгги баҳс (Евгений Королев – Фаррух Дўстов) натижасидан қатъи назар Қозоғистон жаҳон лигасидаги ўз ўрнини сақлаб қолди. Ўзбекистон эса навбатдаги уринишда ҳам жаҳон лигасига чиқа олмади.