Грэм Поттер, ваниҳоят, истеъфога чиқарилди. Аслида бу воқеа футбол жамоатчилиги томонидан анчадан бери кутилаётганди. Поттер даврида Европанинг икки йил олдинги чемпиони, АПЛда 11 ўрингача тушиб кетди. Мавсум тугашига эса атиги 10 тур қолди. "Челси"га яна бир немис мураббийи келиши кутилмоқда. "Бавария"дан кетган Нагельсман, Бёли томонидан яна ишга тайинланиши мумкин. Аммо у ягона вариант эмас. Қуйида "аристократлар" бошқарувига келиши мумкин бўлган мураббийлар рўйхати билан танишасиз.
1. Юлиан Нагельсман
Ҳаммага ушбу танлов қолганларидан кўра ҳақиқатга яқинроқ бўлиб туюлиши мумкиндир. Аммо Нагельсман учун фақатгина "Челси" курашмайди. Ўтган ҳафтанинг бошида ишдан кетган Антонио Контенинг бўшаб қолган ўрни Нагельсманга берилиши мумкин. Шундай экан, икки Лондон клуби ҳали бу борада кураш олиб боради.
2. Маурисио Почеттино
Таҳлилчилар фикрига кўра, Почеттино ҳам ҳар икки Лондон клуби – "Тоттенхэм" ва "Челси"га ташриф буюриши мумкин. Қай бирини танлаш эса аргентиналикнинг ўзига ҳавола. Почеттино олдин "шпорлар"ни бошқарган. Аммо "Челси"даги иш, у учун янгиси бўлади.
3. Бренден Рожерс
Рожерс "Челси"да олдин фаолият юритган. Бироқ, бунда бир муаммо бор. "Челси" Тухель ўрнини "Брайтон"да ажойиб ўйин қурган Поттер билан тўлдирганди. Энди эса "Лестер Сити"нинг омадсиз мураббийи олиб келиниши қанчалик тўғри бўларкин?
4. Луис Энрике
Испания терма жамоасининг собиқ мураббийи Грэм Поттер ҳайдалиш арафасида экани аён бўлганидан бери унинг ўрнини эгаллаш учун фаворитлар қаторида эди. Энрике клублар футболига қайтишни истайди. "Челси" у учун айни муддао бўлиши мумкин. Аммо бу учун Энрике Нагельсман билан рақобат қилиши керак.
5. Жозе Моуриньо
У аллақачон икки давр мобайнида "Челси"да ишлашга улгурган. Учинчи даврни ҳам инкор этиб бўлмайди. Моуриньо "ПСЖ"га таклиф этилиши мумкинлиги ҳақида хабарлар чиққанди. Негаки, парижликлар Кристоф Гальтьени истеъфога чиқариши мумкин. Моуриньонинг ўзи келажаги ҳақида жиддий ўйлаб кўриши керак. Ҳозирча унинг нияти "Рома"даги ишни давом эттириш бўлиб турибди. "Челси"даги ўрин бўш қолгани сабабли, Моуриньонинг яна АПЛга қайтишини инкор этиб бўлмайди.
6. Зайниддин Зидан
Зидан доимий таъкидлаб келмоқда: унда АПЛ жамоалари билан ишлаш нияти йўқ. Шунга қарамай, барибир француз афсонаси номи "Челси" вариантлари ичида мавжуд. Аммо Зиданнинг ўзи бошқа бир топ-жамоани кўзлаб турибди. Буни сиз яхши биласиз.
7. Диего Симеоне
Симеоне номи пайдо бўлганида, кўплаб баҳслар ҳам вужудга келади. Негаки, унинг алоҳида услуби бор. Бу услуб на Грэм Поттерникига, на ундан олдинги Тухелникига ўхшайди. Аксинча, аргентиналик мутахассис ҳимоявий футболни маъқул кўради. Аммо Симеонеда юлдуз футболчиларни қандай қилиб бошқариш борасида катта тажриба мавжуд.
8. Оливер Глазнер
Глазнернинг "Айнтрахт"даги ажойиб иши, унга кўплаб катта клублар қизиқишига сабаб бўлди. 48 ёшли мутахассис "Тоттенхэм" учун ҳам вариант ҳисобланади. Австриялик мураббий ўтган мавсумда қийинчилик билан Франкфурт клубини ЕЛда ғолибга айлантирганди. Глазнер жамоаси бу мавсумда Бундеслигада яхши натижа қайд этмоқда.
9. Рубен Аморим
"Спортинг" устози Грэм Поттер келишидан олдин ҳам "Челси" рўйхатида бор эди. У "Тоттенхэм"га ҳам ишга келиши мумкин. Аморим Португалияда яхши жамоа туза олди. Буни лиссабонликларнинг "Арсенал"га қарши баҳсида гувоҳи бўлдик.
10. Роберто Де Зерби
Де Зерби Поттер ўрнини эгаллаганида, кўпчилик уни танимасди. Айримлар унинг маҳоратига шубҳа ҳам қилган. Аммо у барча фикрларни чиппакка чиқарди. Айни дамда "Брайтон" еврокубоклар учун курашмоқда. Италиялик мутахассис ўз жамоасини прессинг машинасига айлантирди. "Челси" Де Зербини олиб келиши учун, "Брайтон"га 11.5 миллион фунт тўлаши керак бўлади.
ИСМАТОВ Ж.
