Франкфуртнинг "Айнтрахт" клуби ҳужумчиси Рандал Коло-Муани ёзда "Бавария"га ўтиши мумкин. Журналист Кристиан Фалькнинг фикрича, франциялик футболчининг "Альянс Арена"га кўчиб ўтиши яқинда жамоани қабул қилиб олган бош мураббий Томас Тухелнинг хоҳишига боғлиқ бўлади.

Тухель "Бавария" ёзда янги ҳужумчи сотиб олиши керак деган фикрга қўшилади, аммо немис мутахассис ҳали бу мавсумда Бундеслига ўйинчилари орасида энг юқори кўрсаткичга эга бўлган Коло-Муанини маъқуллагани йўқ. Шу билан бирга, "Айнтрахт" ҳужумчини ёзда сотмоқчи эмаслигини аввалроқ маълум қилганди. "Бургутлар" фикрини ўзгартириш учун 100 миллион евродан кўпроқ пул олишлари керак.