«Бавария» бош мураббийи Томас Тухель «Манчестер Сити»га қарши баҳсда жамоасига омад етишмади, деб ҳисоблайди.

Чорак финал баҳси умумий 4:1 ҳисоби билан инглизларнинг ғалабаси билан якунланди. «Бавария»нинг меҳмондаги учрашуви 0:3 ҳисобидаги мағлубият билан якунланган бўлса, Мюнхенда жамоалар 1:1 ҳисобида дуранг ўйнади.

«Менимча, «Манчестер Сити» ўзини анча яхши тутди. Афсуски, ўтган ҳафтадагидек, ҳал қилувчи дақиқаларда омадимиз етишмади. Ўйинимиздан жуда мамнунман.

Биз Европанинг энг яхши жамоаси билан тўқнаш келдик. Ўзимизга бўлган ишонч етишмади ва ҳозирги формамиз яхши эмасди.

Ўйлайманки, ҳисоб ўйинлар мазмунини акс эттирмайди», — деди Тухель DAZN нашрига берган интервьюсида.