Каталониянинг "Барселона" клуби яқин орада бир неча ҳафта олдин шартномасини келаси мавсум охиригача узайтирган ҳимоячиси Маркос Алонсо билан хайрлашмоқчи эмас.

Sport хабарига кўра, "кўк-анорранглилар" раҳбарияти футболчига келаси мавсумда ҳам умид боғлашмоқда. Агар Жорди Альба кетса, Алонсо ҳимоянинг чап қанотида Алехандро Бальдега асосий муқобилга айланади.

Эслатиб ўтамиз, Маркос бу мавсум ҳимоянинг ҳам марказида, ҳам чап қанотида ўйнади. Охирги икки ўйинда ҳимоячи "Барселона"да фойдаланилмаган захира футболчиси бўлиб қолди. Алонсо жамоага ўтган ёзда Лондоннинг "Челси" клубидан текинга келиб қўшилганди.