Биз ёзги трансфер ойнасида "Барселона" сотиши мумкин бўлган футболчиларни саралаб кўрдик. Асосий сабаб жамоада пул етишмаслиги ва молиявий муаммолар. Қуйида эса "Барселона"дан кетиши мумкин бўлган номлар ҳақида сўз юритамиз.
Гави (Испания, ярим ҳимоячи, 18 ёш)
"Челси" Гавини қўлга киритиш орқали таркибини кучайтирмоқчи, аммо "Барса" бошлиқлари футболчини қўйиб юборгиси келмайди. Хави аллақачон футболчига таянишини айтган. Шундай экан Гавининг жамоадан кетиши молияий муаммолар бартараф этилмаса амалга ошиши мумкин.
Франк Кессье (Кот-дЪИвуар, ярим ҳимоячи, 26 ёш)
"Кўк анорранглилар" бу ёзда Кессьени 25-30 миллион евро эвазига сотиши мумкин. Фабрицио Романонинг сўзларига кўра, Франкни "Интер" ҳарид қилмоқчи. Бу трансфер "Барселона" учун жуда фойдали бўлиши мумкин. Негаки, футболчи ўтган йили каталонияликлар сафига эркин агент бўлиб келган эди.
Ансу Фати (Испания, вингер, 20 ёш)
Ансу Фатининг отаси Боранинг жамоа ҳақидаги танқидий баёнотлари футболчининг ёзги трансфер ойнасида сотувга қўйилишига сабаб бўлди. Фати бир неча йил олдин "Барселона"нинг келажаги бўлиши кутилган эди. Аммо воқелик бундай бўлиб чиқмади.
Хорди Альба (Испания, 34 ёш)
Алба шартнома муддати тугагунча (2024 йил ёзи) "Барселона"ни тарк этиш ниятида эмас, бироқ раҳбарият агар футболчи маошини камайтирмаса, шартномани бекор қилишига шама қилган. Афсоналар ҳам молиявий муаммолар сабаб азият чекишмоқда.
Серхио Бускетс (Испания, ярим ҳимоячи, 34 ёш)
Футболчи клубнинг молиявий ахволидан хавотирда - агар томонлар муроса топмаса, Серхио ё МЛСга ёки Саудия Арабистонига кетади.
Усмон Дембеле (Франция, вингер, 25 ёш)
Маблағ етишмаслиги туфайли "Барса" Дембеле билан ҳам хайрлашиши мумкин. "Ньюкасл" мавсум охирида клуб Чемпионлар лигасига чиқса, футболчи учун курашиш ниятида.
Эрик Гарсия (Испания, ҳимоячи, 22 ёш)
Ҳимоячи сифатида Гарсия мавсумни омадсиз ўтказмоқда ва сотувга қўйилиш хавфи остида. Аммо у таянч ярим ҳимоячиси ролида ўсишга эришди. Эҳтимол, раҳбарлар у ҳақидаги фикрларини ўзгартириши мумкин.
