"Тоттенхэм" сардори ва дарвозабони Уго Льорис "Ньюкасл"дан учралган мағлубиятдан сўнг ўз фикрларини билдириб ўтди. Англия Премьер-лигасининг 32-туридан ўрин олган учрашувда Лондон клуби учрашувнинг 20-дақиқасигача ўз дарвозасидан бешта гол ўтказиб юбориб, якунда 1:6 ҳисобида мағлубиятга учради.
“Биз натижадан уялдик, мухлислардан узр сўрашимиз керак. Рақибга ҳеч қандай қаршилик қила олмадик, ёмон ўйнадик ва биринчи бўлимни бутунлай муваффақиятсиз ўтказдик. "Ньюкасл" ажойиб ўйин кўрсатди", - деди Льорис BBC Sport телеканалига.
Жорий мавсумда 36 ёшли дарвозабон барча турнирларда 31 та ўйинда майдонга тушиб, 45 та гол ўтказиб юборган ва 9 марта ўз дарвозаси дахлсизлигини сақлаб қолган.
