Франкфуртнинг “Айнтрахт” клуби спорт директори Маркус Креше “Бавария”нинг ҳужумчи Рандал Коло Муанига қизиқиши ҳақида фикр билдирди.

"Ҳозирча "Бавария"дан ҳам, бошқалардан ҳам аниқ сўровлар бўлгани йўқ. Албатта, Рандал ўз ҳаракатлари билан эътиборни тортди. Унга "Бавария"дек клуб ҳам қизиқиш билдириши нормал ҳолат. Аммо "Бавария" уни сотиб олмоқчи бўлган ягона клуб эмас. Бошқа томондан, Коло Муани ҳали ҳам биз билан ўзини жуда қулай ҳис қилмоқда, унинг биз билан жуда яхши ишлаши мумкин бўлган имкониятлари бор", - дея Крешедан иқтибос келтиради Sky Sports.

Аввалроқ, "Айнтрахт" Коло Муани билан камида 100 миллион евро ва бонуслар эвазига хайрлашишга тайёрлиги хабар қилинганди.

Франциялик футболчи ўтган ёздан буён “Айнтрахт” сафида тўп сурмоқда, унинг шартномаси 2027 йилга мўлжалланган. Жорий мавсумда у клуб сафида барча турнирларда 40 та ўйинда майдонга тушиб, 20 та гол урди ва 14 та голли узатмани амалга оширди.