Англия чемпионатининг 35-турида “Астон Вилла” сафарда “Вулверхэмптон”дан ягона гол ўтказиб юбориб, мағлуб бўлди. Унаи Эмери шогирдлари деярли ҳар бир учрашувда гол уришга муваффақ бўлишса-да, бу сафар “бўрилар”ни ранжита олмади. Испаниялик мураббий ўйиндан мамнун эканини, аммо натижадан мамнун эмаслигини айтди.
"Биринчи бўлимда мен жудаям хурсанд бўлдим, лекин натижадан эмас, ўйиндан. Биз тўпни назорат қилдик ва уларнинг юқори босимига дош бердик. Бизда гол уриш учун имкониятлар бўлди, аммо вазиятларни голга айлантира олмадик. Иккинчи бўлимда "бўрилар"да ҳам имкониятлар бўлди. Биз “Тоттенхэм”дан уч очко ортда қоляпмиз, келаси ҳафта бизни улар билан ўйин кутиб турибди, биз ғалаба қозонишга ва Европа учун бериладиган йўлланма учун курашни давом эттиришга ҳаракат қиламиз", - деди Эмери BBC Sport билан суҳбатда.
