Мадриднинг "Реал" клубига Ла Лиганинг "Хетафе"га қарши ўйин натижасига кўра 0:3 ҳисобида техник мағлубият ёзилиши мумкин.
Ярим ҳимоячи Эдуардо Камавинга жароҳат олиб майдонни тарк этиши учун ҳакам Хуан Мартинес Мунуера Мадридга футболчи алмаштиришни бекор қилишга рухсат берди. Бу ФИФА қоидалари билан тақиқланган.
84-дақиқада “Реал” бош мураббийи Карло Анчелотти ягона гол муаллифи Марко Асенсио ўрнига ҳимоячи Альваро Одриосолани майдонга туширишга қарор қилди.
Ўша пайтда испаниялик ярим ҳимоячи майдонни тарк этганида, Камавинга оқсоқланиб, ўзини алмаштирилишини сўради. Натижада айнан франциялик футболчи алмаштирилди, Асенсио майдонда қолди, Одриосола эса Камавинга ўрнига майдонга тушди.
"Хетафе" Мадриднинг бекор қилинган алмаштирилиши юзасидан рақобат қўмитасига шикоят қилишга қарор қилди. Клуб буни қоидаларга тўғри келмайди деб ҳисобламоқда. Жараён бошланди. Қўмита "Реал Мадрид"га шикоят юборди, унга жавоб бериш учун уч кун бор.
Агар алмаштириш қоидага кўра амалга оширилмагани аниқланса, "Реал Мадрид"га 0:3 ҳисобида техник мағлубият ёзилади. Шунингдек, клуб 6 мингдан 9 минг еврогача жарима тўлайди.