"Манчестер Юнайтед" ярим ҳимоячиси Каземиро бир мавсумда самарали ҳаракатлар қилиш бўйича ўзининг рекордини такрорлади.
Бразилиялик футболчи Англия Премьер-лигасининг 32-туридан ўрин олган "Челси" билан қолдирилган ўйинда (4:1) гол урди.
Бу гол Каземиро учун жорий мавсумдаги барча турнирлардаги еттинчи гол бўлди. 31 ёшли ярим ҳимоячи Англия Премьер-лигасида тўртта, Англия кубогида иккита гол урди. Шунингдек, Англия лига кубогида ҳам унинг ҳисобида битта гол бор.
Каземиро бунгача "Реал Мадрид" сафида ўйнаб, барча мусобақаларда икки марта бир мавсумда 7 та гол урган эди. Бу 2017/2018 ва 2020/2021 йилги мавсумларда содир бўлганди.
Бразилиялик ярим ҳимоячи 2022 йилнинг ёзида "Реал"дан "Манчестер Юнайтед"га ўтган эди. Янги жамоа таркибида у Англия лига кубогини қўлга киритди.