"Тоттенхэм" ҳужумчиси Харри Кейн жорий мавсумда "Бавария"га ўтишни истамайди, деб хабар беради Bild.
Манбага кўра, немис клуби 29 ёшли футболчини ўз сафига қўшиб олмоқчи бўлган жамоалардан бири ва уни ўз услубига энг мос ҳужумчи сифатида кўрмоқда. Бироқ, инглиз футболчиси ё "Манчестер Юнайтед"га ўтмоқчи ёки яна бир мавсумни "Тоттенхэм"да ўтказмоқчи.
Аввалроқ Кейн хорижга кетиш ниятида эмаслиги, чунки у АПЛдаги голлар сони бўйича Алан Ширернинг рекордини (260) янгилашига атиги 48 та гол қолгани ҳақида хабар берилганди.
Ҳужумчи жорий мавсумда “Тоттенхэм” сафида барча турнирлар доирасида 49 та ўйинда майдонга тушиб, 32 та гол урди ва 5 та голли узатмани амалга оширди. Transfermarkt портали унинг нархини 90 миллион еврога баҳоламоқда. Унинг шартномаси 2024 йилнинг ёзига қадар мўлжалланган.
