"Барселона" Испания чемпиони бўлди ва Чемпионлар лигаси гуруҳ босқичига йўлланма олди. Бироқ Каталония клуби бир кун аввал маълум бўлганидек, Европанинг энг нуфузли клуб турниридан четлатилиши мумкин.
Marca нашри хабарига кўра, УЕФА ҳали ҳам "Барселона" борасида бир қарорга кела олмаяпти. Гап шундаки, Каталония клуби УЕФАдан келган 70 та саволга ҳалигача жавоб бермаган. Гап "Негрейра иши" билан боғлиқ, яъни клубнинг ҳакамлар техник қўмитаси собиқ вице-президентига тўлаган тўловлари ҳақида бормоқда. УЕФА жавоб кутмоқда ва вазиятга ойдинлик киритмоқчи. Агар жавобларда "Барселона" томонидан жиддий қоида бузилгани кўрсатилган бўлса, у ҳолда клуб Чемпионлар лигасига қўйилмаслиги мумкин.
"Барселона" яқин кунларда саволларга жавоб бериши керак, чунки еврокубоклар мавсумида иштирок этиш учун аризаларни топшириш муддати яқинда тугайди.
