Хабарингиз бор, 1-14 май кунлари Тошкент шаҳрида тарихда илк бор катталар ўртасида жаҳон чемпионати ташкил этилди.

Ушбу нуфузли мусобақада терма жамоамиз аъзолари 5 та олтин, 2 та кумуш ва 2 та бронза медалларини қўлга киритишди.

Совриндорларимизнинг муваффақиятлари Республикамиздаги маҳаллий ҳокимлик раҳбарларини ҳам бефарқ қолдирмади.

Шу муносабат билан Бухоро олимпия ва паралимпия спорт турларига тайёрлаш марказида чарм қўлқоп усталаримизни тантанали тақдирлашга бағишланган тадбир ташкил этилди. Унда вилоят ҳокими Ботир Зарипов бошчилигидаги секторлар раҳбарлари, спортчилар ва уларнинг мураббийлари, ота-оналар иштирок этди.

Тадбир давомида ҳоким томонидан ЖЧ олтин медали соҳиби Абдумалик Халоков, шунингдек финалчи Саиджамшид Жафаровга Бухоро шаҳридан 2 хонали уй совға қилинди.

Шунингдек, жорий йил 17-26 январь кунлари Таиланд давлатининг Бангкок шаҳрида бокс бўйича 22 ёшгача бўлганлар ўртасида ўтказилган Осиё чемпионатида иштирок этиб, олтин медаль қўлга киритган Бекзод Ҳамидов, Фарзона Фозилова ва Сабина Бобоқулова, бронза медалига сазовор бўлган Зиёда Ярашева ҳам муваффақиятли иштироклари учун муносиб тақдирланишди.

Шунингдек тадбирда  вилоят ҳокимлиги томонидан Бухоро олимпия ва паралимпия спорт турларига тайёрлаш маркази жамоасига замонавиий “Isuzu” автобуси калити тантанали равишда топширилди.

Бундай тадбирнинг яна бири Сурхондарё вилояти ҳокимлигида ҳам бўлиб ўтди.

Унда вилоят ҳокими Улуғбек Қосимов Тошкентдаги жаҳон чемпионатидаги эришилган муваффақият билан олтин медаль соҳиби Баҳодир Жалоловни муборакбод этди ва муносиб тақдирлади.

Тадбир давомида Баҳодир Жалоловга Сурхондарё вилоятидан хонадон совға қилинди.

Боксчининг келажакдаги фаолиятига, навбатдаги мусобақаларида муваффақиятлар тиланди.

Ўз навбатида Ўзбекистон бокс федерацияси спортчиларимизга мана шундай ғамхўрлик учун Бухоро вилояти ҳокимлигига ўз миннатдорчилигини билдиради. Зеро, бундай эътибор келгуси ютуқларга пойдевор вазифасини бажаради.