Май ойи охирида реанимацияга ётқизилган "ПСЖ" дарвозабони Серхио Рико ҳали ҳам Севильядаги Вирхен-дель-Росио касалхонасининг реанимация бўлимида ётганига қарамай ҳушида ва ҳатто яқинлари билан гаплашмоқда, дея хабар бермоқда L'Équipe нашри.

28 май куни Риконинг бошига от урилганидан кейин вертолётда шифохонага етказилган. ОАВ хабарига кўра, дарвозабоннинг миясига қон қуйилиши ташхиси қўйилган.

"Серхио гапиряпти. У бизни исм билан чақирди, кимлигимизни жуда яхши билди, у ажойиб хотирага эга", - деди 29 ёшли футболчининг рафиқаси Альба Сильва. “Умид қиламанки, имкон қадар тезроқ у реанимациядан чиқади. Шифокорлар ишонч ҳосил қилишлари керак, аммо улар ҳали қарор қилишмаган. Биз уларга ишонамиз” - дея қўшимча қилди футболчининг рафиқаси.

Рафиқасининг тан олишича, Рико нима учун касалхонага ётқизилганини ҳали ҳам тушунмайди. “У тўлиқ гапира олгунча кутишимиз керак. Биз уни яхши ва хотиржам ҳис қилишига ҳаракат қиляпмиз" - деди.