Мейсон Маунтнинг "МЮ" футболчисига айланиши бу ёзда амалга ошмаслиги мумкин. Негаки, "Челси" аллақачон 24 ёшли футболчи учун берилган учта таклифни рад этиб улгурди. Шунга қарамай, "қизил иблислар" ҳали ҳам тан бермоқчи эмас. Аммо клуб Маунт учун ортиқча тўлов қилиш нияти ҳам йўқ. Агарда тен Хагнинг бу истаги амалга ошмайдиган бўлса, "Манчестер Юнайтед"да бошқа вариантлар ҳам мавжуд. Қуйида манкунианликлар кўриб чиқиши мумкин бўлган айрим муқобилларга эътибор қаратамиз.

Жеймс Меддисон

Ёши: 26
Клуби: "Лестер Сити"

Маунт сўнгги йилларда Меддисон билан кўп таққосланар эди. Негаки, уларнинг ҳар иккиси ҳам майдонда ўхшаш вазифаларни бажаради. Шу сабабли бу футболчилар Англия терма жамоасида рақобатчиларга айланган.
Маунтдан кўра Меддисонни олиб келишнинг ҳам муаммолари мавжуд. Жумладан, "Лестер" ҳам ўз футболчиси учун кам нарх айтмаяпти: 60 миллион фунт. Ҳа, бу сумма Маунтнинг 70 миллион нархидан арзонроқ. Аммо барибир Чемпионшип клубидан олинадиган футболчи учун анча қимматлик қилади. Трансферлар ойнаси энди очилиши ҳисобга олган ҳолда, кураш ҳали олдинда эканини тахмин қилиш мумкин.

Эберечи Эзе

Ёши: 24
Клуби: "Кристал Пэлас"

Меддисон ўз позициясида Маунтчалик фойдали бўла олмас. Аммо Англия терма жамоасининг янги аъзоси бўлган Эзе ҳаммасини эплайди. У ўтган мавсумни "бургутлар" сафида айнан саккизинчи рақамли футболчи сифатида ҳаракат қилиб ўтказган эди. Гарчанд вазифавий жиҳатдан бир ҳил ролда бўлда ҳам, Эзе Маунт таклиф этадиган тажриба ва функцияларга эга эмас. Бу эса инглиз футболчисининг трансферида тўсиққа айланади.

Муҳаммад Кудус

Ёши: 22
Клуби: "Аякс"

Агарда ҳужумда Маунт бажарадиган ролга "МЮ" бошқа алтернатив қидиришни истаса, у ҳолда, тен Хагнинг собиқ шогирди Кудус айни муддао бўлади. Клуб Муҳаммадга январь ойидаёқ қизиқа бошлаган эди. Бунга унинг Гана терма жамоаси сафидаги ҳаракатлари сабаб бўлган. Аммо айни дамга келиб, ярим ҳимоячи учун "Брайтон" даъво қила бошлади. Шу сабаб "Манчестер Юнайтед"дан бу борада тезроқ ҳаракат қилиш талаб этилади.

Хави Симонс

Ёши: 20
Клуби: "ПСВ"

Ҳужумнинг ҳар қайси чизиғида ўйнай оладиган универсал футболчилардан яна бири Хави Симонсдир. Ёш ярим ҳимоячи ўтган мавсумда ўзини яққол намоён этди. Бу харид ҳам Кудусники сингари муҳимдир. Тен Хаг Симонс каби футболчидан ҳужумга янада динамика қўшишда фойдаланиши мумкин. Афсуски, Нидерландия терма жамоаси аъзоси учун кураш осон кечмайди. Негаки, "ПСЖ"да Симонсни арзон нархга қайтариб сотиб олиш имкони мавжуд.

Педру Гонсалвеш

Ёши: 24
Клуби: "Спортинг"

Агарда "МЮ" фақатгина майдон марказини назорат қила оладиган идеал плеймейкер қидираётган бўлса, у ҳолда "Спортинг" юлдузи Гонсалвеш айни муддао бўлади. Тасодифни қарангки, у бир пайтлар Лиссабон жамоасига, айнан "МЮ" юлдузи Бруну Фернандеш ўрнига олиб келинганди. Португалия терма жамоаси аъзоси 2022-2023 йилги мавсумни 20 та гол ва 15 та ассист билан якунлади. Шу сабабли Гонсалвешга харидорлар кўп бўлади.

ИСМАТОВ Ж.