Олий Лига 24-тур учрашувларини 6 клубнинг 6 нафар футболчиси дисквалификациялар сабаб ўтказиб юборади.

25, 27-28 октябрь кунлари, шунингдек, ноябрь ойида Ўзбекистон Олий Лигаси 24-тур учрашувлари бўлиб ўтади. Ушбу ўйинларда, сариқ карточкалари сони тўрттага етгани сабаб, «Пахтакор», «Навбаҳор», «Динамо», «Қизилқум», «Локомотив» ва «Машъал»нинг жами олти нафар футболчиси ўз жамоаларининг асосий таркибида майдонга туша олмади.

Турни очиб берувчи «Локомотив» ва «Навбаҳор» жамоалари ўртасидаги ўйинда ҳар бир жамоадан бир нафардан ўйинчи майдонга туша олмайди. Пойтахтликларда Зайниддин Тожиев 24-турни мажбурий тарзда ўтказиб юборса, наманганликлар ҳимоячиси Темур Султоновнинг йўқлиги тошкентлик темирйўлчиларга қарши ўйинда бирмунча сезилиб қолиши мумкин.

27 октябрь куни «Металлург»га қарши ўйинда «Қизилқум» таркибида Алишер Саматов, «Бухоро»га қарши ўйинда «Машъал» таркибида жамоанинг етакчи ҳимоячиларидан бири – Габит Сапаргалиев майдонга туша олмайди. 28 октябрь куни ўтказиладиган «Пахтакор» – «Динамо» ўйинида ҳам ҳар бир жамоа таркибидан биттадан ўйинчи учрашувда иштирок эта олмайди: шу куни ярим ҳимоячи Ойбек Қиличев майдон эгаларига ёрдам бера олмаса, самарқандликлар таркибида асосий ҳужумчилардан бири – Рўзимбой Аҳмедов майдонда ҳаракат қила олмайди.

Олий Лига, 24-тур дисквалификациялари
Зайниддин Тожиев («Локомотив»)
Темур Султонов («Навбаҳор»)
Алишер Саматов («Қизилқум»)
Габит Сапаргалиев («Машъал»)
Ойбек Қиличев («Пахтакор»)
Рўзимбой Аҳмедов («Динамо»)