Хабарингиз бор, айни пайтда миллий чемпионатимизда давралар оралиғидаги танаффус пайти юзага келди. Шу боис, анъанага мувофиқ, сиз азиз мухлисларни “Навбаҳор”нинг биринчи даврага оид статистик рақамлари билан таништиришни лозим деб топдик.

Суперлиганинг ортда қолган 13 та учрашувида «Навбаҳор» 9 та ғалаба,  2 та дуранг ва 2 та мағлубиятни қайд этди. Рақиблар дарвозасига 23 та гол урган ҳолда, ўз дарвозасидан 6 та тўп ўтказиб юборди ва бу Суперлигадаги энг яхши кўрсаткичдир.

“Лочинлар”дан ташқари, ОКМК  жамоаси футболчилари ҳам рақиблар дарвозасига 23 та гол уришган, аммо ўз дарвозаларидан 17 та тўп ўтказиб юборишган.

Таъкидлаш жоизки, “Навбаҳор” биринчи давра баҳсларида ўз дарвозасидан энг кам тўп ўтказиб юборган ва энг яхши ҳимояга эга жамоа бўлди.

Ўз ўрнида Самвел Бабаян шогирдларининг ўтказилган 13 та ўйиндан 9 тасида ўз дарвозаларидан тўп ўтказиб юборишмаганини ҳам айтиш лозим.

Албатта, бундай ижобий натижани қайд этишда “Навбаҳор”нинг тажрибали дарвозабони ҳамда сардори Ўткир Юсупов билан бирга ҳимоячиларнинг ҳам муносиб ҳиссалари бор.

Яна шуни ҳам таъкидлаш жоизки, «Навбаҳор» биринчи даврада ўз майдонида бўлиб ўтган барча 7 та беллашувда ҳам ғалаба қозониб, Наманганда юз фоизлик натижани қайд этди.

Шунингдек, “лочинлар” 13 та ўйиндан 4 тасида йирик ҳисобда ғалаба қозонишгани,  улардан 3 тасида эса дарвозалари дахлсизлигини сақлаб қолишганини ҳам айтиш лозим.   

Жамоа 13 та баҳсда рақиблар дарвозасига 23 та гол уришди. Бу эса ҳар бир ўйинга 1,8 тадан гол тўғри келади, дегани.     

“Навбаҳор” биринчи давра баҳсларида жами 29 очко тўплаган ҳолда (74, 4 фоизлик натижа), давралар оралиғидаги танаффусга пешқадам сифатида чиқиб кетди.

“Навбаҳор” ПФК матбуот хизмати.