"Бавария" бош мураббийи Томас Тухель Лондонда Харри Кейн билан учрашди. Немис матбуотида тарқалган хабарга кўра, икки томон инглиз ҳужумчисининг Германияга кўчишни маслаҳат қилган. Кейннинг "Тоттенхэм" билан тузган шартномаси 12 ойдан кейин тугайди. Шу сабабли у сотувга қўйилиши керак. Янги шартнома борасида ҳозирча гап-сўз бўлиши мумкин эмас. "Бавария" Кейн учун ўтган ой аввалида 60.2 миллион фунт таклиф қилганди. Рад жавобини олгач, иккинчи таклиф тайёрлана бошланди.
BILD нашрининг ёзишича, Тухель Кейннинг Лондондаги уйига ташриф буюрган. Улар эҳтимолий трансферни муҳокама қилишган. Англия терма жамоаси аъзоси немис мураббийига қарата ЕЧЛда ғолиб бўлишни исташини билдирган.

Харри Кейн Лондонда 17 миллион фунтлик кошонада оиласи билан истиқомат қилади. Футболчининг оиласи рафиқаси Кети ва учта фарзанди, Иви, Жейн ҳамда Луисдан ташкил топган. Уй ички машғулотлар зали ва еттита ётоқхонани ҳам ўз ичига олади. Ҳаммаёқда футболчининг "Тоттенхэм"даги даврини эсга солувчи расмлар осилган бўлсада, унинг клубдаги 14 йиллик фаолияти бу ёзда якун топиши мумкин. Кейн соврин дардида Германияга ҳам кетишга тайёр. Ҳа, ҳужумчи учун "Манчестер Юнайтед" жиддий қизиқиш билдирганди. Аммо расмий таклиф ҳали келмаган. "Челси"ни ҳам яна бир вариант сифатида кўрсатиш мумкиндир. Негаки, Кейн ва Почеттино ораси жуда яқин. Афсуски, "Тоттенхэм" раиси Даниэль Левининг "Челси" билан ораси ҳақида бундай деб бўлмайди. Шу сабабли ҳар икки инглиз клубини амалда бирор ишга қодир дея олмаймиз.

Англиядаги мураккаб ҳолат "Бавария"га Кейнни сотиб олиш борасида устунлик беради. У Мюнхенда Роберт Левандовски ўрнини эгаллаши мумкин. Польшалик ҳужумчи клуб билан саккиз йиллик ҳамкорликдан кейин 2022 йилда "Барселона"га жўнаб кетганди. Якунига етган мавсумда "Бавария" тўпурари Серж Гнабри бўлди. Ҳа, жамоада Мюллер, Мусиала, Мане, Сане каби йирик номлар бор. Аммо уларнинг ҳеч бири марказий ҳужумчи ишини маромига етказиб бажара олмайди. Бу омил эса Харри Кейнга "Бавария"да эҳтиёж борлигини англатади.

ИСМАТОВ Ж.