Хабарингиз бор, "Андижон"нинг грузиялик ярим ҳимоячиси Нодари Кавтарадзе 29 июнь куни “Пахтакор”га қарши беллашувда тиззасидан жароҳат олиб ўйинни давом эттира олмаслиги маълум бўлди ва майдонни анча эрта тарк этди.

Албатта, Кавтарадзега соғлик тилаймиз ва бундай дамларни енгиб ўта олади. Унинг ҳозирги ҳолатидан хабар олиш мақсадида “Андижон” матбуот хизмати Кавтарадзе билан боғланди.

— Нодари, “Пахтакор”га қарши учрашувда кутилмаган жароҳат сабабли сафдан чиқдингиз. Куни кеча шифокорлар кўригида бўлдингиз. Қандай ташхис қўйишди?
— Ташхис кувонтирадиган даражадамас. Жароҳатим оғир, операция керак. Тикланиш учун 4-6 ой керак бўлади. Операция Москвада ўтказилади ва тикланиш ҳам.

— Айтинг-чи, биринчи даврада кўпроқ қайси ўйин ёдингизда қолди?
— Хотирамга мухлисларимизни қувонтирган ғалабалар келади. Айниқса, “Насаф”ни енганимиз, “Металлург” устидан қозонилган йирик ғалаба ва “Пахтакор” билан ўтган охирги ўйиндаги натижа.

— Сизни қўллаб-қувватлаётган мухлисларга нима дея оласиз?
— Ишқибозларимизсиз бундай натижалар бўлмасди. Чунки улар бизнинг 12-ўйинчимиз! Майдонга тушганингизда ёлғиз эмаслигингизни ҳис қиласиз.  Стадионимиз тайёр бўлганидан сўнг, уйимиздаги ўйинларни мухлислар билан қандай ўтишини тасаввур қиляпман!