Дортмунднинг “Боруссия” клуби ҳужумчиси Марко Ройс энди жамоа сардори бўлмайди, дея хабар беради жамоа расмий сайти.

“Шахсан мен сизга бир нарсани айтишим жуда муҳим: таътилда ўйлашга кўп вақтим бўлди ва мен сардорликдан воз кечишга қарор қилдим. Кеча мен бу ҳақда Эдин Терзич ва Себастьян Келга хабар бердим.

Менга бу тасмани беш йил давомида фахр ва шараф билан тақишга рухсат берилди. Йиллар давомида қўллаб-қувватлаганингиз учун ташаккур.

Мен Эдин ва Себастьянга жуда яхши ворис топишларини тилайман - улар муваффақиятга эришишларига ишончим комил”, - деди Ройс Дортмунд сайтида чоп этилган видеомурожаатида.

34 ёшли немис апрель ойида "Боруссия" билан шартномасини 2024 йилнинг ёзига қадар узайтирганди.

Ройс ўтган мавсумда жамоа сафида барча турнирларда 31 та ўйинда майдонга тушиб, 8 та гол урди ва 8 та голли узатмани амалга оширди.