Эркин агент мақомида бўлган "Кристал Пэлас"нинг собиқ ҳужумчиси Уилфрид Заха "ПСЖ", "Наполи" ва "Галатасарой" билан фаол музокаралар олиб бормоқда. Эслатиб ўтамиз, аввалроқ Заха "Лацио", "Фенербахче" ва "Ал-Наср" билан шартнома шартларини келишиб олгани хабар қилинганди. The Guardian хабарига кўра, футболчи таътилдан қайтганидан сўнг келажаги борасида якуний қарор қабул қилиши кутилмоқда.
Манбага кўра, унинг вакиллари билан музокара ўтказган сўнгги клублар - "ПСЖ", "Наполи" ва "Галатасарой". 30 ёшли футболчи мавсумий маоши 35 миллион евро бўлишига қарамай, “Ан-Наср” таклифини рад қилиши мумкин. Мавжуд иккала таклиф ҳам "Кристал Пэлас"нинг ҳафтасига 234 000 эвро маошидан анча паст бўлишига қарамай, унинг Италия ёки Туркияга кўчиб ўтиш имконияти сақланиб қолмоқда.
Transfermarkt интернет портали 30 ёшли футболчининг бозор қийматини 27 миллион еврога баҳоламоқда. Якунланган 2022/2023 йилги мавсумда ҳужумчи Англия Премьер-лигасида 27та ўйин ўтказиб, 7та гол урган ва 2 та ассистентлик амалга оширган.