"ПСЖ" президенти Носир Ал-Хелайфий яқинда Килиан Мбаппега ультиматум қўйди. Клуб 24 ёшли ҳужумчи Парижда ўйнашда давом этиши учун шартномани узайтириши керак, деган фикрни илгари сурмоқда. Лига1 гранди Килианнинг келаси ёзда эркин агент сифатида кетишига рухсат бермайди. Шу билан бирга, футболчининг ўзи аввалроқ 2024 йилда келажагини ҳал қилиш ниятида эканлигини маълум қилганди - у "ПСЖ" билан меҳнат шартномасини узайтиришни режалаштирмаяпти.

"ПСЖ" Мбаппени жамоа билан бирга самолётда учиш ҳуқуқидан маҳрум қилиши мумкин! - Испаниянинг Спорт нашри саҳифаларида шундай сарлавҳали хабар эълон қилинди. Тахминларга кўра, агар Мбаппе шу вақтгача шартномани узайтирмаса, "ПСЖ" ҳужумчига 22 июль куни мавсумолди турга учиб кетишига рухсат бермайди.