"Лацио" "Нью-Йорк Сити" билан ҳужумчи Тати Кастельяносни сотиб олиш бўйича келишувга эришди, дея хабар беради инсайдер Фабрицио Романо. У ижара асосида "Жирона"да ўйнайди. 

Манбага кўра, римликлар 24 ёшли аргентиналик учун 15 миллион евро тўлайдилар. Қайд этилишича, футболчи билан шахсий шартнома шартлари келишиб олинди. Кейинги ҳафтага тиббий кўрик режалаштирилган.

Кастельянос ўтган мавсумда "Жирона" сафида 37 та ўйинда майдонга тушиб, 14 та гол урди ва 1 та голли узатмани амалга оширди. Ла Лиганинг бир ўйинида у "Реал Мадрид"га қарши (4:2) покер қайд этганини ҳам қайд этамиз.