Диққат, таркибдаги футболчиларнинг умумий трансфер суммаси бўйича ҳаттоки, «Манчестер Сити» ва «ПСЖ» ҳам энди «Арсенал»дан орқада.

Хуллас, Микель Артета жамоаси Деклан Райс («Вест Хэм») трансферидан сўнг ушбу рейтинг пешқадамига айланди! Эътиборга олиш керак, таркиб баҳоси transfermarkt портали рақамлари асосида чиқарилган.

«Арсенал»нинг таркиб баҳоси бўйича 1-ўринга кўтарилгани transfermarkt томонидан ҳуқуқини 90 млн. еврога баҳолаётган Райснинг ўзигагина боғлиқ эмас. Дейлик, жамоанинг бошқа янги аъзолари ҳам умумий суммага бинойидек улуш қўшишди: Кай Хаверц (55 млн. евро) ва Юрриен Тимбер (42 млн. евро). Умуман, «Арсенал»да баҳоси 40 «лимон»дан баланд нақ 12 нафар футболчи бор.

Яна бир факт: АПЛнинг 6та клуби - «Арсенал», «Манчестер Сити», «Челси», «Ливерпуль», «МЮ» ва «Тоттенхэм» таркибининг умумий баҳоси 5,5 млрд. евродан ошиб кетди.

Рейтингнинг биринчи 10талигида 4та топ-лигадан вакил бор (фақат «А» сериядан йўқ). «Реал» эса таркибида баҳоси 100 миллион евродан баланд 4 нафар футболчи (Винисиус - 150 млн., Жуд Беллингем - 120 млн., Федерико Вальверде - 100 млн. ва Родриго - 100 млн.) борлиги билан мақтанишга ҳақли.

Кучли 10таликка кирган бошқа жамоаларда бундай футболчилар 2 нафардан кўп эмас. «Манчестер Сити» футболчиларнинг ўртача трансфер баҳоси бўйича етакчи - 44 млн. евро. «Реал»­да бу кўрсаткич 38 млн. евро бўлса, «Арсенал» янада паст (36,5 млн. евро).