Diqqat, tarkibdagi futbolchilarning umumiy transfer summasi bo‘yicha hattoki, «Manchester Siti» va «PSJ» ham endi «Arsenal»dan orqada.

Xullas, Mikel Arteta jamoasi Deklan Rays («Vest Xem») transferidan so‘ng ushbu reyting peshqadamiga aylandi! E’tiborga olish kerak, tarkib bahosi transfermarkt portali raqamlari asosida chiqarilgan.

«Arsenal»ning tarkib bahosi bo‘yicha 1-o‘ringa ko‘tarilgani transfermarkt tomonidan huquqini 90 mln. yevroga baholayotgan Raysning o‘zigagina bog‘liq emas. Deylik, jamoaning boshqa yangi a’zolari ham umumiy summaga binoyidek ulush qo‘shishdi: Kay Xavers (55 mln. yevro) va Yurriyen Timber (42 mln. yevro). Umuman, «Arsenal»da bahosi 40 «limon»dan baland naq 12 nafar futbolchi bor.

Yana bir fakt: APLning 6ta klubi - «Arsenal», «Manchester Siti», «Chelsi», «Liverpul», «MYU» va «Tottenxem» tarkibining umumiy bahosi 5,5 mlrd. yevrodan oshib ketdi.

Reytingning birinchi 10taligida 4ta top-ligadan vakil bor (faqat «A» seriyadan yo‘q). «Real» esa tarkibida bahosi 100 million yevrodan baland 4 nafar futbolchi (Vinisius - 150 mln., Jud Bellingem - 120 mln., Federiko Valverde - 100 mln. va Rodrigo - 100 mln.) borligi bilan maqtanishga haqli.

Kuchli 10talikka kirgan boshqa jamoalarda bunday futbolchilar 2 nafardan ko‘p emas. «Manchester Siti» futbolchilarning o‘rtacha transfer bahosi bo‘yicha yetakchi - 44 mln. yevro. «Real»­da bu ko‘rsatkich 38 mln. yevro bo‘lsa, «Arsenal» yanada past (36,5 mln. yevro).