Уругвайлик футболчи Луис Суарес Лионель Месси ортидан “Интер Майами”га ўтмоқчи.

ESPN нашри хабарига кўра, Суарес ҳозирги жамоаси “Гремио”дан шартномасини қолган қисмини сотиб олиб, фаолиятини “Интер Майами”да давом эттиришни режалаштирмоқда.

Америка клуби ҳам Лионель Месси, Серхио Бускетс ҳамда Хорди Альба трансферларидан сўнг, уругвайлик ҳужумчи трансфери бўйича ҳам иш олиб бормоқда. Бироқ, Бразилия клуби Луисни қўйиб юбориш истагида эмас.

Бу эса ҳужумчи ва клуб ўртасидаги муносабатлар совуқлашиши сабаб бўлган. Суарес жамоанинг сўнгги ўйини қайдномасига киритилмаган. Ўйиндан сўнг “Гремио” бош мураббийи Ренато Гаушо матбуот анжуманида Суареснинг тақдири ҳақида гапиришдан бош тортган.

Бразилия жамоаси футболчига ультиматум қўйган: ё шартномасини тўлиқ сотиб олиш ёки шу битим охирига қадар ўйнаб бериш. Луис Суареснинг “Гремио” билан амалдаги шартномаси 2024 йил декабрига қадар мўлжалланган. Агар Луис ўз шартномасига тўлов қиладиган бўлса, 10 миллион доллар атрофида тўлаб бериши лозим бўлади.

Ундан ташқари Луис ҳозирда 36 ёшда ва доимий жароҳатлар туфайли фаолиятини якунлаш ҳақида ўйлаб юрганди. Энди эса собиқ жамоадошлари йиғилган “мини-Барселона”га ўтиш учун ўз шартномасига ўзи сотиб олишга ҳам тайёр.

Эслатиб ўтамиз, “Интер Майами” Лионель Месси ва Серхио Бускетсни ўз сафига қўшиб олди. Бир неча кундан сўнг эса Хорди Альба трансферини ҳам эълон қилди. Луис Суарес ушбу футболчилар билан “Барселона”да бирга тўп сурган.