Ўзбекистон делегацияси таркибида БААдаги Осиё чемпионатида иштирок этаётган ЎФФ матбуот хизмати вакили Бахтиёр Маметов бугунги ўйиндан кейин матбуот анжумани ҳақида батафсил маълумотни Федерация сайтига қўйди.

"Жаҳон чемпионатига чиққан инсон нимани ҳис қилса, мен ҳам шундай ҳиссиётни бошимдан кечиряпман. Қисқа қилиб айтганда, мен — бахтиёрман. Ўз мақсадимизга эришганимиздан ва ярим финалга чиққанимиздан чексиз хурсандман. Бугунги ўйин кўрсатдики, Осиё футболи ўсиб бормоқда ва жаҳон чемпионатига чиқиш борган сари оғирлашиб бормоқда", - дея ўз сўзини бошлади Аҳмаджон Мусаев.

Биринчи бўлимда қаттиқ ҳаяжонландик. Йигитлар кучли босимни ҳис қилишди. Ҳаяжонни бочиб олишганидан кейин эса иккинчи бўлимни яхши ўтказишди. Пенальтилар сериясига машғулотларда тайёргарлик кўргандик. Пенальтилар ҳам футболнинг бир қисми. Футболчилар бу борада ҳам ўз маҳоратларини кўрсатишлари лозим".

"Биз дастлабки вазифага эришдик. Энди бизни янада масъулиятли, лекин қизиқарли баҳслар кутиб турибди. Ярим финалдаги ўйинимиз ёрқинроқ бўлади, деб ўйлайман. Финалгача етиб бориб, бош совринни қўлга киритишга умид қиламан", деди терма жамоамиз бош мураббийи.