Эрон миллий терма жамоаси бош мураббийи Карлос Кейруш жамоа концентрацияни йўқотмасдан ўйнаса, Ўзбекистон устидан ғалаба қозониши мумкин эканлигини ISNA ахборот агентлигига айтиб ўтди.

"Эртага жуда яхши ўйин бўлади. Ушбу ўйинда ижобий натижага эришишга умид қиляпмиз. Жамоамизда мотивация юқори ва ўйинга тайёрмиз", дейди португалиялик мутахассис.

"Ўзбекистоннинг ўйин услуби Россияникига ўхшаб кетади. Уларнинг ўйин услубига кўникмаганлик ҳақидаги гап-сўзлар асосга эга эмас. Ўзбекистон — яхши жамоа. Мен бу жамоани жуда ҳурмат қиламан. Улар 90 дақиқа давомида ўз ўйинларини кўрсата оладилар. Шунинг учун биз ўйин давомида концентрацияни йўқотмаслигимиз керак", дейди Кейруш.

"Жароҳатланган Али Каримий захира ўриндиғида ўтирадими?", деган саволга Кейруш қуйидагича жавоб берди: "Таркибимизда 23 нафар соғлом футболчи ва икки нафар жароҳатланган ўйинчи бор. Ўйни протоколига фақат соғлом футболчилар киритилади".

"Ўзбекистонга қарши ўйинда ғалабага кафолат бера оласизми?", дея йўлланган саволга бош мураббий: "Мен жамоада мотивация ва жанговар руҳ борлигига кафолат бераман. Натижа эса яратганнинг қўлида. Биз мухлисларнинг қўллаб-қувватлаши остида фақат ғалаба учун ўйнаймиз. Ўйинчилар курашга тайёр", дея жавоб берди.

"Мухлисларнинг стадионда ташриф буюришлари биз учун муҳим аҳамиятга эга. Эронда иқтидорли йигитлар жуда кўп ва биз жаҳон чемпионатида иштирок этишга муносиб эканимизни исботлашимиз лозим. Ғалаба йўлида барча футбол оммаси бирлашиши керак", дея сўзини якунлади Карлос Кейруш.