Украиналик ҳужумчи Артём Довбик «Днепр-1»ни тарк этиб, Испания чемпионатига йўл олди. 26 ёшли ҳужумчи билан «Жирона» шартнома имзолади.
Клуб расмий сайтининг хабар беришича, томонлар 2028 йилнинг ёзига қадар ҳисобланган узоқ муддатли меҳнат шартномасини имзолаган.
Transfermarkt маълумотларига кўра, харид етти миллион еврони ташкил қилган.
Украина Премьер-лигасининг сўнгги мавсумида тўпурарлар пойгасида Довбик ғалаба қозонди. Ҳужумчи 29 та ўйин ўтказиб, 24 та гол (8 та пенальтидан) урган ва 5 та голли узатмага муаллифлик қилган.
«Жирона» Ла Лигани 12 август куни «Реал Сосьедад»га қарши сафар учрашуви билан бошлайди.
